:: 人生有幾多個十年

第一個十年。

幼稚園在順利村讀，第一日返學喊到傻，英文女老師好多豆皮，好惡死。學校的天井位有個小型遊樂場，唔常玩，因為每日返屋企都搭校車，無時間留在幼稚園慢慢玩等家長接。

媽媽與大姨放假就會帶我去尖沙咀新港中心飲茶，再去尖東的公園玩，有噴水池，繩架，玩一日都未夠。

升上小學，一家幾日迫在二百幾呎的舊式十六層，阿姨的碌上格架床有陳百強海報，下格有姊妹雜誌，床下底就有隻大肥狗。不用返學的日子，我常被嘈到似打仗的洗衣機聲嘈醒。婆婆閒時又會在菊花牌草紙上練字，寫得最多的，就係佢個名。



樓下有間茶餐廳，爺爺有時間就會帶我去嘆茶，我要凍檸水加一個菠蘿飽就已經好滿足，菠蘿飽賣七毫子，新鮮熱辣。我有時會拉著爺爺到衣紙鋪買文具；有人結婚，爺爺又會帶我去對面的童裝店買新衫；天氣熱，爺爺又會帶我都樓下士多買扭蓋的玻璃樽一點二五公升可樂飲，買之餘，我仲會伸隻手入冷凍櫃的下格，浸一下那些用來涼汽水的冰水，透心涼。

到遊樂場玩，木版鞦韆是我的最愛，企起身搖到上半空，試過有一次非常用力的，把整個鞦韆翻到半空，兜了一大個圈才停低，好驚但好刺激。

放咗學，返到屋企肚餓，婆婆有時會整碗豉油窩蛋白飯。有時又會匿埋鄰居的屋企，三五朋友仔拍下貼紙，睇下公仔書。到咁上下，朋友屋企要開飯，我先靜靜地拉開鐵閘返屋企，以為咁樣會無人知，但當然最後都係穿煲，每次都打到扒街，玩一次就打一次，每次都打到開花，但我依舊都係繼續玩，細路仔真係唔識死。

第一個十年，眨下眼就過咗。