人気ブログランキング | 話題のタグを見る

:: Karvitz's Music Picks - XX

音樂雜談

想先講林峯演唱會。



當家小生,加上無線都是投資者之一,理所當然的瞓身落力宣傳。東張西望有,娛樂頭條有,連音樂特輯都有,再加埋其宣傳策略,主題曲〈Let’s get wet〉 ,海報又濕晒身咁,仲加埋話會著T-back!使唔使去到咁盡先?但我知道一班妹妹仔應該好受落。在林峯未跳入英皇之前,查實一早就已經有歌錄緊,而且仲係 Paco 旗下,當時最深刻的,應該是最難忘記的〈記得忘記〉。

全世界都擔心究竟林峯夠唔夠歌唱,兩隻大碟再加埋什麼什麼電視主題曲都只係勉強湊夠三十首,得唔得呀?好怕最尾個演唱會會變成英皇群星拱照演唱會,又或者係溏心風暴三之嫲嫲大龍鳳演唱會,一大堆嘉賓嘻嘻哈哈咁,都真係幾難攪。





講完林峯的演唱會,再講下一眾台灣歌手來香港開演唱會。縱貫線的賣個滿堂紅,又叫好座,促使一眾演唱會話事人立即谷返一個女版縱貫線出來,希望可以賺到一筆。雖然未知票房收成點,但論排場,《黃金 15 年情牽女人心演唱會》明顯差少少,陳潔儀萬芳潘越雲林曉培加埋最想睇的辛曉琪,五個湊埋始終有種臨時拉伕之感覺,睇唔出會有什麼化學作用,頂盡都只係一個普通的唱家班演唱會。



女人心演唱會都還好,起碼見到有聲勢咁開個記招,又上娛樂新聞台做專訪談女人心,但另一組張宇陳昇黃品源的《三個好男人》就顯得更加低調。不容置異,張宇陳昇黃品源三個都唱得,但始終夾唔到我的口味,就正如縱貫線的羅大佑一樣,如果可以換走,加返陳昇趙傳就必定會捧場。可惜陳昇埋咗呢個班,張宇及黃品源都不是我那杯茶,算吧,下次埋過第二班或陳昇自己攪一個先捧場喇!

未完喎,台灣幫仲有隊棒棒糖來緊,一連兩場的《我是傳奇2009亞洲巡迴演唱會》在紅館開,如果開三面台九千個位,兩場要成萬八人,香港的少女真係咁迷?是我已經與年青一代脫咗節?定係主辦商高估咗棒棒糖?遲下就會知。

------------------------------------------------------------
:: Kar' s Hot Picks

我 就算擁抱過後回頭沒海岸 也換來見聞觀光

1. 如果東京不快樂 – 楊千嬅
2. 於心有愧 – 陳奕迅
3. 想得太遠 – 容祖兒
4. 地平線 – 官恩娜
5. Don’t break my Heart – 黑豹
6. 隨心所欲 – 羅琦
by karvitz | 2009-05-25 20:50 | :: 有歌而發