人気ブログランキング | 話題のタグを見る

:: 英倫十日遊,有無人有興趣?



看過《最佳情.敵》,之後再翻睇《日落巴黎》及《情留半天》,突然間有個念頭想出去歐洲一轉,行橫街窄巷,看藝術畫廊,寫意地到處走。

發神經的在MSN 寫上「英倫十日遊,有無人有興趣?」幾隻字之後,當晚來自不同範疇的朋友都彈出來,「嘩!你又去旅行?」、「你有平機票咩?」、「有無攪錯,你份咩嘢工,又去旅行?」、「我有,我有興趣,但要去完日本返來,如果銀彈都未用晒!」、「去十日,要用幾多錢?」你一言就我一語。

呢一程英倫遊,其實好似等公屋一樣,照正常排期,有排都未有機會出發,因為台灣吉隆坡浮羅交怡耶加達及曼谷統統都排緊隊,輪緊上樓。但如果有特殊情況呢,即係我肯揀離島區,又或者我願意揀「吉」屋,呢鋪糊應該會好快會食得出。

計一計數先,首先時間唔係問題,要我轉機再轉機再轉機先到倫敦都無問題,兩千七蚊剩機票,千幾蚊雜項稅收,四千五蚊就可以起程。十日減去頭尾兩日機程,實際只有八日。先住倫敦一晚,再過法國兩晚,之後倫敦四圍玩。預酒店一千蚊一晚,兩個人 Share 每人五舊,八晚差不多五千蚊。加埋其他飲飲食食,我諗萬三、四應該可以攪掂。

雖然英磅水位而家升返,但仍然都算係抵玩,如果錯失咗呢次良機,下一波低潮都唔知係幾時。話說回頭呀,計數係計得幾好睇,但大「拿拿」萬三、四蚊,要拎出來就拎出來,確實係有點赤赤地。仲要搵多個幪炳 (幪炳 = 又肯無啦啦拎皮幾嘢出來去玩) 一齊去,真係難上加難喇!

我再問多一次喇!英倫十日遊,到底有無人有興趣? :P
by karvitz | 2009-06-20 23:52 | :: 日記仔女