Karvitz's DayS

:: 溫哥華．第二篇。

氣候篇。
溫哥華在今年七月的降雨量是零，等如整個溫哥華歷史性地在七月都無落雨，而且陽光超猛烈及創出有史以來最炎熱的一個夏天。

聽當地人講，溫哥華在一年裡面大概有 200 日是陰天或雨天，我能遇到這樣的好天氣，運仔又真係差唔晒喇！

講到刷新溫度最高的紀錄，實際只不過是廿七、八度，而且有涼風吹吹，不像香港又濕又潮。現在除了天氣預報看到溫度外，還流行一種叫體感溫度的說法，外國人稱為 : feel like” 。香港近日的溫度是33度，但體感溫度就是接近 42 度；而溫哥華的溫度是 23 度，體感溫度則只是28 度，你話相差幾遠。

我知世事唔會咁完美，所以最後兩、三日的行程就開始陰天及落雨了。

:: 繼續旅程。

:: 溫哥華．第一篇。

飛行篇。
講過與老闆要分開飛，由於正值暑假旺季，機票難求及貴，所以我得從上海轉機。我帶著丁點期望在上海登機，無失望之餘仲有驚喜，如果唔係，我點會開一篇講飛行篇。

由上海飛溫哥華需時十個半鐘，下午一時上機，抵溫哥華是同日的早上九時多。今次搭東方航空的客機，出發時搜索過是新機艙設計，丁點期望就是從此而來。

一坐低，前面部電視機竟然係 10 吋，而旁邊更有 USB 插頭供予充電用，非常貼心。而坐位間隔亦沒有過份地太窄，算是舒服。十個鐘頭的航程吃了兩個半飛機餐，看了兩齣半電影，瞓咗兩個幾三個鐘頭覺後，拉返開個窗，外面依舊是大白天，落地的時間是當地的朝早九點幾，我真真正正咁賺咗一日時間。

:: 繼續旅程。

:: 2013 遠行

這是第一次帶任務在身咁出國，即係出差囉，陪老闆出國去開幾日會，之後有幾日遊下玩下咁。由於出發前的劇情比較複雜而導致我同老闆要分開飛，雖然講到咁，但實情算是好事，不用全程 12 個鐘頭對住老闆。嘻嘻。

今日目的地是 – 溫哥華。

呢個地方又是列入「從來都無諗過會去」的系列裡面，所以就算老闆講到明部份洗費要自付時，我有一刻考慮過是否跟去，咁最後當然係諗通咗。

我對溫哥華的認識不深，出發前只知道是香港人的移民熱點，網上有提及過撞口撞面都是香港人及滿街盡是廣東話，感覺似乎奇怪，親身體驗過後發現只有 Richmond 區出現此情況，溫哥華市區普遍都以英 / 法語為主，咁都好，起碼真係似出咗國。

既然不是旅行，咁就試下唔當遊記咁寫。

:: 偷人地個仔。

在朋友的 fb 看到她仔仔的相片，那個帶著笑來探索世界的神情，除了超可愛外，就是勁可愛。但這個發自內心的神情在大人的面孔上真的很少見，是我們已經習慣了衝擊、或是再沒有令你覺得驚喜的事，還是你也有這個神情但不好意思表露出來？

試試，找一樣新的事物讓你有這個表情吧！要真心的，不是真心的，是看得出的。

BB 媽媽，借個仔來用下吧！XDDD

:: 陳年相簿。

早幾日搵返之前歐遊的相出來，發覺有好多相都未見過太陽，既然走返出來，不如拎來曬一曬，為未來的半工半玩的遠行作個準備吧。
:: 呢個係由香港飛法蘭克福的飛機餐，味道如何？唔記得咗......但個包好硬囉。
:: 到咗酒店，房間竟然有朱古力送，我有懷疑過係唔係上手留低的.......
:: 在旅遊區的外圍亂走，肚餓就是旦衝入一間餐廳，空無一人兼無英文 menu 的。
:: 轉機去巴塞，驟眼一睇前排黑人男，以為航機出事要趴前喇....
:: 呵，邊行邊搵食搵到間食自助餐，唔貴但多款，唔算超好食，但就夠晒飽。嘻嘻！
:: 當然唔少得行超市，呢罐生力好 young 好 sharp，相比香港的老氣.... hmmmm